કચ્છ જિલ્લા વહીવટીતંત્રે અંજાર તાલુકાના વરસામેડી અને સીનુગ્રા ગામમાં દબાણ વિરોધી મોટી કાર્યવાહી હાથ ધરી છે. કચ્છ કલેક્ટર આનંદ પટેલ અને નિવાસી અધિક કલેક્ટર ડી.પી.ચૌહાણના માર્ગદર્શન હેઠળ આ કાર્યવાહી કરવામાં આવી છે.
વરસામેડી સીમમાં એરપોર્ટ રોડની બાજુમાં આવેલી સરકારી જમીન પરથી ગેરકાયદે કોમર્શિયલ દુકાનોના દબાણો દૂર કરવામાં આવ્યા છે. આ કાર્યવાહીમાં 260 ચોરસ મીટર સરકારી જમીન ખુલ્લી કરાવવામાં આવી છે. આ જમીનની અંદાજિત કિંમત રૂ. 5.65 લાખ છે.
સીનુગ્રા ગામની ગામતળની જમીન પરથી 240 ચોરસ મીટરનું દબાણ દૂર કરવામાં આવ્યું છે. આ જમીનની કિંમત રૂ. 54,020 છે. આ કાર્યવાહીમાં અંજાર મામલતદાર બી.વી.ચાવડાની આગેવાનીમાં સર્કલ ઓફિસર, માર્ગ અને મકાન વિભાગના અધિકારીઓ, કર્મચારીઓ અને પોલીસ કર્મચારીઓએ ભાગ લીધો હતો.
